Alia: 2 Luglio
Alia: 2 Luglio Lu paisi si struvigghia cu lu scrusciu di la tampurinata e cu li botti di la masculiata. Pi tutti l`alisi è festa ranni. E` la festa di la patruna, la Madonna di li Grazi. Li fistuna cu li luci di tanti culura, li firanti e lu tiru a bersagliu, li giostri e lu zuccaru filatu. Cumincianu tri giorna di festa. La banda sona pi li strati purtannu allegria tra la genti. Li carusi currinu e gridanu fistusi, li fimmini s` affaccianu e talianu. Tutti nni scurdamu li pinsera. Lu paisi si ripopola cu l`emigranti chi tornanu e cu li genti di li paisi vicini. tutti l’alisi su divuti a la Madonna, li residenti e puru l’emigranti e Idda nun passa iornu ca nun li binidici. Li mumenti chiù mpuntanti di la festa sunnu la missa di menziornu a la Matrici e la solenni maistusa pricissioni. Rapi la pricissioni un fratellu ca porta, mputiri a li vrazza, pi tuttu lu percorsu lu stinnardu. A seguiri sfilanu a du fila li confratelli cu la tunichedda, lu curduni e la torcia addumata nta la manu Appriassu sfilanu li pirsuni cu li purmusioni. C’è cu sfila cu li muli carricati di furmentu, c’è cu sfila scausu e cu sfila cu lu figghiu nta li vrazza. Dopu li confratelli e li purmusioni arriva la vara cu supra la statua di Maria ca porta nta lu pettu lu bamminu. La vara arriccuta di ciuri e manti pregiati veni purtata a spadda di li volontari, masculi e fimmini ca fannu anticchia l‘unu Si crea un‘ atmosfera accussì magica e coinvolgenti ca taliannu la Madonna ca passa, un brividu ti veni nta la schiena e provi commozioni indescrivibili. Dopu la vara di la Madonna sfilanu tutti l‘ autorità: lu sinnacu cu la fascia triculuri, la giunta comunali cu tutti l‘ impiegati, lu marasciallu cu li carabbinieri e li pirsuni importanti di lu paisi. Cu li strummenta nta li manu e li spartiti, sfila la banda di li musicanti di lu paisi ca sona li musichi appropriati. All’urtimu, sfilanu a du fila lu riastu di l‘alisi e nta lu mienzu di li du fila un parrinu, cu lu megafono nta la manu, ca li fa cantari. A lu passaggiu di la vara, li fimmini c’arrestanu a li casi, salutanu la Madonna stinnennu nta li finistruna cuperte e linzola. La pricissioni dura ammenu tri uri e a lu ritornu, davanti a la chiesa, lu parrinu binidici li pirsuna mentri spara la masculiata e li campani sonanu a festa. La festa continua cu lu spettaculu nta la chiazza pagatu cu li sordi arricugghiuti nta lu paisi. All’urtimu si chiui cu l’imponenti iocu di focu. La festa finiu, ognunu di l’alisi torna a la propria casa suddisfato e già l’indomani pensa a la festa di natr’annu. Giuseppe Biondo
