Lu veru pani di casa

Lu veru pani di casa Nta tutti li casi di lu me paisi, c`era l`usanza tutti li simani, di fari lu veru pani di furmentu. Cu lu crivu si cirnia la farina e intra la maidda, cu li manu si mpastava, nzemmula cu lu sali, l`acqua e lu criscenti. Araciu, araciu si furmava lu pastuni ca la fimmina tanti voti rigirava e cu la forza di li pusa lu caddiava. Poi a pezzu a pezzu l`arrutulava dannucci la forma di lu pani e a unu a unu, nta lu lettu lu pusava. Cummigghiatu cu li cuperti ncapu e sutta iddu cu lu caluri lentamenti allivitava e nta la facci, vunciannu, si sgranava. Quannu lu furnu biancu addivintava cu lu rasteddu si niscianu li tizzuna e cu na scupa vagnata si puliziava. Lu focu si mittia nta l’accupaluci E dda dintra addivintava carbonella Ca sirvia pi la bracera nta lu mmernu. La fimmina sculata di suduri mittia la pala pronta e cu li manu pigghiava lu pani di lu lettu, e cu pacienzia e granni maestria attentamenti lu sistimava nti la pala e nta lu furnu a unu a unu lu pusava. Ora ca lu pani è tuttu nfurnato e lu cupecchiu di lu furnu chiusu bonu dda dintra arasciu arasciu va cucennu. Già si cumincia a sentiri lu profumu Ca sall’arga nta la casa susu e iusu E puru fora nta la strata si senti. Sulu cu lu ciauru ti rapia lu pitittu Quant’era bonu lu pani cunsato Cu l’ogghiu lu sali e na sarda salata. Lu pani sfurnatu si cummigghiava cu li coperti Pi fallu arrifriddari araciu araciu P‘arristari morbidu pi tutta la simana. Finutu lu pani la fimmina stanca, assittata nta la seggia dicia suddisfatta: sugnu cuntenta, oggi lu pani vinni veru bonu.